„Руската инвазија на Украина продолжува да има сериозно влијание врз човечкиот и физичкиот капитал и животната средина, со загуба на животи, пад на животниот стандард и зголемување на сиромаштијата, како и оштетување на инфраструктурата“, рече извршната директорка на ММФ, Кристалина Георгиева.
Таа наведе дека и покрај тоа, „украинскиот народ е отпорен, а вештото креирање на владината политика и постојаната надворешна поддршка помогнаа да се поддржи макроекономската и финансиската стабилност“.
Ројтерс пренесува дека ММФ продолжува да ги проучува социјалните, еколошките и економските влијанија од уништувањето на браната Каховка претходно овој месец, што доведе до големи поплави во јужна Украина.
ММФ рече дека украинските власти постигнале „силен напредок“ кон исполнување на реформските обврски под „тешки услови“, исполнување на квантитативните критериуми до април и структурните критериуми до јуни.
ММФ очекува својата следна ревизија на украинската програма да ја изврши на крајот на ноември или во почетокот на декември, додаде Георгиева.
