Сепак, откако на новинарите им подели соопштение во кое ветува дека неговата компанија, Блу стар лајн, ќе изгради „луксузен брод од врвен стил“, Палмер призна дека допрва треба да обезбеди бродоградилиште. Поминаа речиси 10 години откако Палмер одржа слична прес-конференција во лондонскиот хотел Риц за да го открие својот сон за изградба на нов Титаник.
Уште тогаш новинарите го прашуваа дали проектот е измама или рекламен трик, а Палмер одговори дека има „доволно пари за да изгради 10 Титаници“. Во меѓувреме, Палмер отслужи мандат во австралискиот парламент и потроши милиони долари на различни правни предизвици, туристички потфати и скапи изборни кампањи, пишува Гардијан.
Работата на Титаник 2 беше прекината во 2015 година, откако изби спор околу плаќање меѓу една од компаниите на Палмер и кинеската компанија Ситик. Палмер повторно го најави проектот во 2018 година со предложен датум на почеток до 2022 година.
На денешната конференција за доцнењата тој ја обвини пандемијата на ковид. Тој рече дека овојпат луѓето треба да му веруваат бидејќи „сега има повеќе пари“. „Многу е позабавно да го правиш Титаник отколку да седиш дома и да си ги броиш парите“, рече Палмер, кој месецов ќе наполни 70 години.
„Сѐ што ви треба за да бидете среќни е да имате некој што ве сака, некаде да спиете навечер и доволно за добар оброк. Освен тоа, другото е илузија“, додаде тој. Тој е уверен дека може навреме да обезбеди бродоградилиште за да почне да го гради бродот во почетокот на следната година.
Првото патување на бродот е закажано за јуни 2027 година. Бродот треба да патува од Саутемптон до Њујорк, повторувајќи го несреќното патување на оригиналот во 1912 година. Палмер најави дека тендерите за изградба ќе бидат објавени во јуни, а договорите ќе бидат потпишани до декември.
Тој процени дека бродот тежок 56.000 тони ќе чини меѓу 500 милиони и 1 милијарда долари. Потврди дека финската компанија за дизајн и поморско инженерство на бродови Делтамарин го поддржала проектот. Иако вистинскиот брод сè уште го нема ни на повидок, тој покажа петминутна 3Д-анимација од сите девет палуби на Титаник 2.
Палмер тврди дека ќе ангажира некои од „најдобрите дизајнери за крстосување во светот“. Бродот би имал ист ентериер и распоред на кабините како и оригиналниот брод, заедно со балска сала, базен и турска бања.
Оригиналниот Титаник удри во санта мраз за време на своето прво патување преку Атлантикот и потона на 15 април 1912 година, што резултираше со смрт на приближно 1.500 патници и членови на екипажот.
