„Тој случај е од минатото, од претходната Влада, снесен како кукавичко јајце, коешто треба да имплодира во овој период. Тоа што имаше да каже и Комисијата го слушаме по медиумите, луѓето кои се дел од таа Комисија се присутни на медиумите. Добив информации од МВР дека едно од лицата кои беа предмет на измена на судска одлука е повторно приведено. Добив информација дека има уште неколку дела кои што се поврзани со ова лице. Нема да одам чекор понатаму да коментирам и да прејудицирам судски одлуки. Јас сум човек легалист, верувам во презумпција на невиност, но она кое што го знам е дека истото лице вќе доби 30-дневен притвор. Оставам на правосудните органи понатаму да одлучат како да постапуваат за други случаи каде што постои основано сомнение за сторен криминал“, вели Мицкоски на новинарско прашање дали Министерството за правда ќе понесе одговорност во однос на испратените предлози за помилување до Комисијата за помилување.
За Законот за јазиците кој во декември треба да се најде пред Уставниот суд, премиерот Мицкоски смета дека треба да се земе предвид мислењето на Венецијанската комисија и да се остави на Уставниот суд да одлучи.
„Не зборуваме за Законот за јазици туку за две – три одредби од Законот за коо претходно Венецијанската комисија даде негативен став и негативно мислење. Да бидеме уште попрецизни, станува збор за одредби во кои што имаме претпоставен случај каде судијата ќе биде од етничка припадност на заедницата која е над 20 отсто, во случајот албанската, а од другата страна обвинителот и странките ќе бидат од македонската или друга етничка заедница, и тогаш да имаме обраќање на својот мајчин јазик, односно во случајот албанскиот. И тоа е така уште од поранешната федерација во која што составен дел беше тогашната Социјалистичка Република Македонија. Да сме прецизни, не станува збор за целиот Закон за јазици туку за овие две одредби. И Венецијанската Комисија вели ова не е применливо и затоа е добро да не биде во законот. Но Владата на Зоран Заев тогаш, инспирирана од Али Ахмети и Бујар Османи и останатите, одлучи да оди на сила, и знаете што се случуваше тогаш, кога Талат Џафери ги фрлаше амандманите итн, кога не ја слушаше Венецијанската комисија, која ќе ве потсетам, е услов согласно новата методологија во Преговарачката рамка, која што е лично побарана од претседателот Макрон. Сега, или сме за Европа или не сме. Затоа ги замолувам политичките партии, одговорни и неодговорни политичари, да не прават притисок врз судиите на Уставниот суд. Да оставиме да видиме како ќе се одлучи и понатаму да видиме што правиме“, рече Мицкоски.
Тој посочува дека така било и со воведувањето на балансерот, кога, вели, упатувале во јавноста пораки дека не е добро, се злоупотребува, не е уставно, но оти, никој не ги слушал и сме дошле до ситуацијата која сега ја имаме.
„Среќа што оваа Влада има внатрешен демократски механизам па може да изработи предлог кој ќе биде и согласно Уставот и согласно заштита од мајоризација. Многу е важно вистински да ја испраќаме пораката кон граѓаните“, вели Мицкоски.
