„Добро е драфт законот да оди на мислење во Венецијаснката комисија за да биде сѐ чисто и на крај да не испадне како сегашните закони коишто се половични и затоа се проблематични, како Законот за јазиците, со балансерот. Немаме против тоа, а што ќе содржи не можам да кажам. Но, можам да ви кажам дека ќе има јавна дебата во која ќе бидат вклучени академци од сите универзитети, професионалци од таа сфера, сѐ во функција да биде најдобро решение и решение кое не може утре, задутре да биде оспорено од некој. Значи, мора да внимаваме на уставната категорија правична застапеност, но, воедно да не дојдеме во судир со Уставот и пак утре-задутре да ни се случи оваа ситуација“, изјави Меџити.
Прашан кога очекува да биде подготвена нацрт верзијата, тој вели дека се работи на тоа.
Портпаролката на Владата Марија Митева денеска изјави дека до Владата досега не е пристигнато предлог решение за правична застапеност откако Уставниот суд го укина Балансерот. Митева вели дека прашањето е отворено и дека ќе се разговара во рамки на коалицијата и ќе се отвори широка дебата. Ставот на Владата е пред да се донесе законското решение, да биде испратено до Венецијанската комисија.
„Во овој момент нема такво решение коешто е проследено до Владата, ниту на владина седница и за истото веднаш штом се создаде можноста, јавноста ќе биде информирана. Во однос на Балансерот којшто е укинат веќе го кажавме ставот дека истиот ја заврши својата употребна вредност така што целиме кон затворање на прашањата коишто во минатото се покажале како непродуктивни и создавање на нови решенија кои ќе значат навистина правична застапеност“, рече Митева на денешната прес-конференција во Владата.
По укинувањето на правилото за вработување по етничка припадност таканаречениот балансер, од коалицијата Вреди најавија дека подготвуваат предлог-законско решение. Министерот за здравство Арбен Таравари во саботата во изјава за медиумите рече дека законот се подготвува и за оваа недела најави јавна дебата.
