„Србија не смее да се сомнева дека нејзината иднина е во ЕУ. Тоа е стратешки избор кој мора да се потврди, знаете колку ни е важно. Интеграцијата во ЕУ доаѓа од заедничкото минато и заедничките вредности. Мораме да одиме напред заедно, да ги исполниме нашите ветувања и да не го пропуштиме овој важен момент“, рече Макрон синоќа за време на заедничкото обраќање со српскиот претседател Александар Вучиќ во Елисејската палата во Париз.
La France est attachée à l’avenir européen de la Serbie, un avenir qui s’écrit dès maintenant.
Француска је посвећена европској будућности Србије, будућности која се сада пише. pic.twitter.com/61Aqzv7bAV
— Emmanuel Macron (@EmmanuelMacron) April 8, 2024
Тој изјави дека Србија мора да продолжи конкретно да го демонстрира својот избор преку усогласување на својата надворешна политика поблиску со онаа на Европската унија.
„Во оваа смисла, сакам да го поздравам вашето неодамнешно учество на средбата во Тирана организирана од албанскиот премиер Еди Рама за претседателот на Украина Володимир Зеленски. Тој избор треба да биде потврден, продолжувајќи и забрзувајќи ги реформите за зајакнување на владеењето на правото, независноста на судството, медиумскиот плурализам и интегритетот на изборниот процес, како и во други области“, рече Макрон.
Тој, исто така, посочи дека за ЕУ е важно БиХ да остане единствена земја. Тој наведе и дека неодамна усвоениот Европски план за раст на Западен Балкан им служи на земјите од регионот да ги „надминат конфликтите од минатото“, да продолжат со внатрешните реформи и да ја зголемат конкурентноста на своите економии.
„Србија може да смета и на поддршката на Француската агенција за развој, која минатата година инвестираше 570 милиони евра во Србија и која ќе продолжи да биде партнер на вашата земја во согласност со европските стандарди“, рече Макрон.
Тој посочи дека од неговата прва посета на Белград во 2019 година, соработката меѓу двете земји е интензивирана и оцени дека економските односи меѓу Франција и Србија се во „реален раст“.
Макрон изјави дека француските компании се сè поприсутни во Србија, дека инвестираат таму бидејќи имаат доверба во иднината, но изрази уверување дека е можно да се оди уште подалеку во други сектори – животната средина, сообраќајот и транспортот, одбраната, вештачката интелигенција, цивилниот сектор, како и нуклеарната енергија.
„Морам да кажам дека имам голема доверба во вашата земја, но и во вас како лидер на земјата. Отсекогаш гледав дека ги исполнувате вашите ветувања“, му рече тој на Вучиќ. Макрон изјави дека евроинтеграцијата на Србија е од заеднички интерес и дека е сигурен дека Србија може да игра стратешка улога.
„Убеден сум дека Србија може да игра важна улога во зајакнувањето на стратешката автономија на ЕУ. Веќе го правите тоа и утре ќе го направите со вашиот индустриски развој“, рече Макрон. Тој посочи и дека зачестеноста на контактите зборува за односите меѓу двете земји, како и за интензитетот на билатералните односи.
„Тоа покажува колку е важно пријателството меѓу двете земји за Франција: пријателство обележано со посветеноста на Србија за европска иднина. Срцето на нашето партнерство е поддршката на Франција за евроинтеграцијата на Србија“, рече Макрон.
