Македонија се прикажа во лошо издание против Хрватска, а сега има нов противник со сличен квалитет, селекцијата на Чешка.
Чесите не ги паметиме по добро, со нив последен пат игравме во далечната 2005 година и загубивме со високи 6-1. Вкупно сме играле трипати, имаме два порази и едно реми.
„Кога сте член на едно Европско, тоа е доволен догказ за квалитетот. Чешка покажа дека е и тоа како е квалитетна репрезентација составена од играчи кои настапуваат во Премиер лигата, во Бундеслигата во Серија А… Имаат и голем број домашни фудбалери, бидејќи имаат квалитетна лига која им е база на репрезентацијата. Тие се сосема поинаков ривал од Хрватска, меѓутоа со огромен квалитет. Неслучајно тие се на Европско првенство, а ние сме уверени дека како тим можеме да напредуваме од ваквите натпревари со поквалитетни ривали од нас, да ја видиме моменталната форма и да добиеме слика за нашите квалитети и домет во моментот“, рече Милевски на вчерашната прес-конференција.
Чешка пред мечот со Македонија одигра пријателски натпревар со Малта на кој славеше со 7-1. Чесите се во серија на победи и сакаат со таков тренед да влезат на Европското првенство.
Задачата на македонските фудбалери е да се покажат во подобро издание отколку на дуелот со Хрватска и да му покажат заби на квалитетниот противник.
Натпреварот се игра на „Малсовичка Арена“ во градот Храдец Кралове, со почеток од 18 часот.
