„СДСМ не може ниту да замисли, а камо ли да организира Конгрес со над 420 делегати, со јасна национална визија и со масовна поддршка од народот. Нивниот ‘конгрес’ би можел да се одржи во поширока канцеларија, затоа што вистинските социјалдемократи одамна ги нема, и народот ги напушта засекогаш. Тие нè напаѓаат затоа што сме гласни, храбри и исправени. А тие не знаат поинаку освен да служат. На ДУИ. На бегалецот Артан Груби и Васко Ковачевски, на двоецот Заев-Филипче, дечките со златни визи, спремни за бегање“, рече Мемов.
Тој го обвини портпаролот на СДСМ, Мартин Костовски, за „учество во уривање на уставниот поредок“ и „распродажба на националните интереси“, алудирајќи на неговата улога во објавувањето на Законот за употреба на јазиците и Преспанскиот договор.
„Јазикот, историјата, културата и самобитноста на македонскиот народ не се предмет на преговори – тие се темелот врз кој стоиме. Македонија ќе биде членка на ЕУ, но не како народ без име, туку како Македонци со гордост, идентитет и достоинство. Нашиот пат е европски, но нашата душа е македонска“, истакна Мемов.
ЗНАМ ја промовираше и т.н. Национална платформа за македонско национално единство, која, според Мемов, била игнорирана од другите партии без да биде разгледана.
Мартин Костовски – организациски секретар на СДСМ на денешната прес-конференција изјави дека претседателот на ЗНАМ, Максим Димитриевски, ги погазил сите свои изборни ветувања.
