„Во рамките на овогодишното собрание, за член на Одборот на директори на AmCham по вторпат беше избран г. Живко Мукаетов, генерален директор и претседател на Управниот одбор на ‘Алкалоид’ АД Скопје, со што уште еднаш се потврдува неговата посветеност, како и посветеноста на компанијата на принципите за транспарентност, интегритет и за активно учество во градењето подобра бизнис-клима“, се вели во соопштението од генералното собрание на АмЧам.
„Алкалоид“ е долгогодишен и горд член на АмЧам Македонија, од основањето на комората во 2000 година. Компанијата активно ја поддржува нејзината мисија и редовно учествува во иницијативите, одразувајќи ја својата силна посветеност на принципите за одговорно корпоративно управување. AмЧам претставува важна платформа за соработка со водечките американски и домашни компании и овозможува конструктивен дијалог за политики, конкурентност и за економски развој.
Покрај г. Мукаетов, во новиот состав на Одборот на директори беа избрани и Огњен Лазиќ (Пивара Скопје), Драган Давитков (PwC), Александра Ивановска (Рош) и Костас Николау (Титан Усје). Работата на Одборот на директори на Американската стопанска комора е фокусирана на унапредување на регионалната соработка, како и на соработката со клучните владини институции и со Амбасадата на САД, а еден од суштинските аспекти на овој одбор е мотивирање и охрабрување на членките на АмЧам да бидат гласот на прогресивниот бизнис-сектор. Мрежата на АмЧам низ Европа брои 49 подружници.
По завршувањето на официјалниот дел беше организиран свечен јубилеен прием, на кој присуствуваа претставници од институциите, дипломатскиот кор, меѓународните организации и од компаниите членки. Настанот уште еднаш ја потврди улогата на АмЧам како платформа која ги поврзува јавниот и приватниот сектор, која поттикнува партнерства и која иницира структурни реформи.
По повод 25-годишнината, „Алкалоид“ упатува искрени честитки до АмЧам и ги поздравува нејзината значајна улога и придонесот во развојот на деловната заедница.
