Во правилникот е наведено дека сите мали, средни и големи трговеци кои вршат дејност трговија на мало, согласно Националната класификација на дејностите има должност дневно да ги објавува цените на стоките кои ги пласира на пазарот на својата веб-страница на јасен и достапен начин, преку посебен дел на веб-страницата на трговецот посветен на цените (ценовник). Објавените цени треба да бидат достапни без потреба од регистрација или дополнителна најава.
Ажурирањето на цените треба да се врши секој ден до 10 часот, а во случај на ненамерна техничка грешка, трговецот е должен да ја корегира грешката во рок од 24 часа.
Доколку од страна на трговецот се нудат промотивни или попустни цени, на веб-страницата треба да биде означена редовната цена, процентот или износот на намалувањето, како и времетраењето на промоцијата или попустот.
Спред надлежните, со ваквиот начин на објавување на продажните цени ќе се обезбеди транспарентност, поголема конкурентност и намалување на цените.
„Измените на законот стапија на сила на 4 март и со нив е предвидено во рок од 45 дена од објавувањето на законот во Службен весник секој трговец на мало и големо да ја објави тековната продажна цена на производите. Согласно законските измени и правилникот што го изготви Министерството за економија и труд, трговцит,е почнувајќи од 18 април ќе мора да ги објавуваат цените на својата веб страница“, изјави министерот за економија и труд Бесар Дурмиши на прес-конференцијата во средата.
Изземање од ваквата одлука вчера побараа од Здружението на приватни аптеки, според кое аптеките не треба да се третираат како обични трговци.
„Сакаме да потенцираме дека аптеките не се класични малопродажни објекти, туку здравствени установи на ниво на примарна здравствена заштита, каде работи лиценциран здравствен кадар, магистри по фармација и фармацевтски техничари. Нашата основна улога е да обезбедиме здравствена услуга и фармацевтска грижа за пациентите, преку издавање и советување за употреба на лекови, следење на терапијата и едукација на граѓаните, а не да вршиме трговија во класичната смисла, изјави Билјана Божиновска“, член на Извршниот одбор на Здружението на приватни аптеки.
„Транспарентноста мора да биде поголема од страна на маркетите, граѓаните треба да знаат каде да ги трошат нивните пари и кои цени се поевтини. Треба да им излеземе во пресрет на граѓаните. Се работи за закон кој ги опфаќа гоилемите ланци маркети и тие имаат капацитет и свои веб-страници и може да ја спроведат оваа законска мерка“, вели Дурмиши.
Во однос на барањето на Комората на трговци на големо и мало претежно со прехранбени и непрехранбени производи, пијалоци и тутун да се продолжи рокот за имплементација на одлуката, министерот Дурмиши планира средба со нив наредната недела.
Казните за непочитување на законската обврска се движат и до 10.000 евра, а министерот Дурмиши најавува дека инспекторите на Пазарниот инспекторат ќе вршат проверки на терен.
Измените на Законот за заштита на потрошувачите беа донесени на собраниската седница одржана на 25 февруари. Сличен закон има донесено и Хрватска.
