Животниот век на овие животни се движи меѓу 14 и 20 години, а бизонот во Скопје од 2011 година беше вистинска атракција за посетителите.
Од Зоолошката градина објаснуваат дека пред околу година и половина кај животното била дијагностицирана пневмонија, по што започнал долготраен процес на терапија и внимателно следење од ветеринарите и неговите негуватели.
„Иако со многу посветеност успеавме да ја стабилизираме неговата состојба, во изминатите две недели повторно покажа знаци на слабост и отежнато дишење. Веднаш беше вклучена интензивна секојдневна антибиотска терапија и постојан надзор, но за жал, и покрај сите наши напори, не успеавме да го спасиме,“ наведуваат од ЗОО Скопје.
Европскиот бизон важи за редок и загрозен вид, а неговото присуство во Скопската зоолошка градина беше од големо значење за едукација и зачувување на биолошката разновидност.
