Во неодамнешно интервју, во однос на претстојните локални избори – дали Вреди ќе настапи со заеднички листи за советници и кандидати за градоначалници, Таравари кажа дека тоа прашање е отврено уште од минатата година, кога се појави идејата за Вреди од коалиција да прерасне во една партија.
„Заедничка наша констатација, во јули или август, минатата година беше дека подобро е да одиме со четири партии до локални избори и после локални избори да се обидеме да бидеме една партија. Меѓутоа, тогаш, баш на тој состанок, јас кажав – доколку одиме со четири партии, тогаш и советничките листи добро би било да ги имаме секој за себе. Оти јас знам, 2021 година со Алтернатива ние бевме заедно на локални избори и колку мака имавме две партии да се усогласиме за иста советничка листа. И замислете, сега ќе дојдеме во ситуација четири партии за една советничка листа“, рече Таравари.
На прашањето, како прогнозира дека Вреди ќе настапи на следните избори, тој одговори дека посакува да се изнајде формула за да излезат заедно, но како што наведе „интуицијата му говори дека одржливоста на Вреди и после избори да биде една партија, е речиси невозможна мисија“.
„Можеби грешам, времето ќе покаже“, кажа Таравари.
Портпаролот на Вреди, Дритон Сулејмани, за Мкд.мк изјави дека и во коалицијата „првпат слушаат“ за ваквите гледишта на еден од партнерите во коалицијата.
„Навистина во досегашната комуникација немавме никакви сигнали за ваквите ставови на господинот Таравари, дека трансформацијата на коалицијата во една партија е невозможна, и првпат ги слушнавме во неговото интервју. Што се однесува до мислењето на другите партнери во коалицијата, напротив – општ е ставот дека тоа не е невозможна мисија. И не е тоа само став за некоја далечна иднина, туку работиме на таа трансформација, само што е потребно време за синхронизација и конституирање на телата. Сметаме и дека треба да имаме заеднички настап и на локалните избори“, вели Дритон Сулејмани.
Во контекст на истата дилема што ја постави Таравари за понатамошната политичка трансформација на Вреди, вицепремиерот Изет Меџити, воедно и претседател на Демократско движење, дел од споменатата коалиција – кратко одговори: „Парламентарното мнозинство е стабилно“.
Коалицијата Вреди, која е и дел од владината коалиција, е составена од четири партии: Алтернатива, чиј лидер е Африм Гаши; Алијанса на Албанците на Арбен Таравари; Движење Беса – предводено од Билал Касами и Демократско движење на чело со Изет Меџити.
Ј.П.
