Како што информираше попладнево за МИА, Цветанка Тодоровска Митрева, виш кустос археолог во Музејот, настанот беше организиран под наслов „Мозаична разгледница од Демир Капија“.
„Европските денови на културното наследство вообичаено се одбележуваат од 23 до 29 септември. Во нашите активности се вклучија ученици од основното општинско училиште „Димче Ангелов – Габерот“. Под менторство на наставничката по ликовно образование Тина Вучиниќ, учениците изработија прекрасни дела. Инаку, темата на овогодинешната манифестација на европско ниво, беше ‘Архитектонско наследство: Прозорец кон минатото – врата кон иднината’“, појасни Тодоровска Митрева.
Таа додаде дека манифестацијата се одржува секоја година во повеќе од 50 земји во Европа, а Македонија е дел од европското семејство на земји, што ја организираат оваа манифестација, во голем број институции од областа на културата.
