„Меѓународните извештаи, вклучувајќи ги и оние на Европскиот парламент, го потенцираат опасното влијание на „српскиот свет“ во нашата земја. Денес тоа влијание се запечати со нови договори, продадени како ‘економска соработка’ и ‘регионална стабилност’, но кои всушност претставуваат целосно заробување на државата од Белград со благослов на Вреди“, потенцираат од ДУИ.
Како аргументи за своето незадоволство за влијанието на т.н. „српски свет“ во Македонија, од ДУИ во соопштението наведуваат „фактите“, кои според нив „говорат сами за себе“.
„Именувањето на Иван Стоилковиќ за вицепремиер за Охридскиот договор;
прифаќањето српски донации за изградба на цркви во Тетово; дочекот со државна церемонија на Милорад Додик во Скопје; одбележувањето на српските битки во Битола од страна на српските министри, како ‘српска војна на нивните земји’; учеството на Српската православна црква во државни церемонии; потпишувањето енергетски договори од директорите на Вреди со српски компании; продорот на српски компании во телекомуникациите; дефилето на српски министри во Скопје со окупаторски речник, нарекувајќи ги Македонија и Косово ‘српски земји’, а масакрите ‘ослободување’ “, се набројува во соопштението на ДУИ.
Според ДУИ, кулминацијата се случила на 10 септември, кога Бујаре Абази – претседателка на Комисијата за хартии од вредност – дозволила влез на српската „Алта Банка“ на финансискиот пазар во Македонија.
„Ова е институционален криминал, потпишан и запечатен од Вреди, кој го отвора патот за финансиска инвазија на Србија во срцето на нашата економија.
Прашањата што се наметнуваат: Што беше дискутирано на вчерашните средби меѓу Белград и Скопје и зошто се чува како државна тајна? За што се договорија двете влади на штета на интересите на Албанците? Кои други области ќе бидат предадени на српското влијание?
Вистината е едноставна: Мицкоски и ВРЕДИ се алатки на „српскиот свет“, а Албанците ја плаќаат и ќе ја плаќаат цената на ова сервилство.
ДУИ потврдува дека ќе остане цврсто на страната на Албанците, во одбрана на Охридскиот договор, албанскиот јазик и националните интереси. Овие не можат да се преговараат, не можат да се продаваат на масите во Белград и никогаш нема да дозволиме жртвите на албанските генерации да бидат предадени за партиски интереси“, се наведува во соопштението на ДУИ.
