„СДС ја стави Македонија во пламен за ситни политички поени. Шоферот на Заев е фатен како подметнува пожар. Тоа е планот на пироманската СДС – државата да гори, а нивните апологети да шират страв и несигурност кај граѓаните“, се наведува во партиското соопштение.
Според ВМРО-ДПМНЕ, лицето А.Н., вработен како возач во Општина Струмица, каде Заев е актуелен градоначалник, било приведено од страна на полицијата. Партијата посочува дека и самиот Заев признал дека осомничениот бил дел од неговиот тим.
Во соопштението се наведува и дека на достапни фотографии и видеа од минатото, осомничениот може да се види во друштво на Заев, меѓу другото и во периодот кога тој ги предавал, како што се вели, „бомбите“ на Специјалното јавно обвинителство.
„Станува збор за човек од највисока доверба на Заев“, велат од ВМРО-ДПМНЕ, и додаваат дека е легитимно да се постави прашањето по чија насока делувал осомничениот за подметнување пожари.
Партијата упати критики и до Венко Филипче, повикувајќи го јавно да се огради од, како што го нарекуваат, „сценариото за намерно палење пожари“. Според ВМРО-ДПМНЕ, молкот на Филипче би значел соучесништво со политиките на Заев.
„Ако остане без реакција, ќе потврди дека е едно со Заев и дека ја спроведува неговата агенда на штета на државата“, стои во соопштението.
ВМРО-ДПМНЕ апелира до Јавното обвинителство да постапува непристрасно и да не дозволи, како што тврдат, прикривање на криминал поврзан со СДСМ и ДУИ.
„Правосудните органи мора да постапат, а возачот на Заев да ја добие најстрогата казна“, се наведува на крајот од реакцијата.
