„Лажната загриженост на СДС на прес-конференциите е само бледа маска за напад врз ВМРО-ДПМНЕ и истовремено инструмент за спас на Коцевски“, се наведува во партиското соопштение.
Според опозициската партија, СДСМ покажал лицемерие со тоа што на само неколку недели од критиките кон обвинителот, сега не гласал за интерпелацијата против него, „со што го спасил од одговорност на отворена сцена пред целата јавност“.
„Коцевски ја поткопува улогата на обвинителството и ја продлабочува недовербата на граѓаните во правосудниот систем, кој според последните податоци има доверба под 2 проценти“, додаваат од ВМРО-ДПМНЕ.
Партијата го обвинува Коцевски за непостапување по сериозни наводи за криминал во кои, како што тврдат, се вклучени високи функционери на СДС и ДУИ. Наместо да обезбеди правда, според нив, обвинителот служи за „системска заштита на политички моќници“.
„Граѓаните ја гледаат меѓусебната заштита на Коцевски со СДС и ДУИ. Наместо да глумат критичари и да злоупотребуваат трагедии, време е СДС да застане на страната на владеењето на правото“, се вели во соопштението.
ВМРО-ДПМНЕ порачува дека „обвинител кој штити политичари треба да си замине од функцијата“ и апелира за итно воспоставување на функционална правда и владеење на правото во државата.
