Според соопштението, партијата тврди дека постои меѓусебна поврзаност меѓу поранешниот премиер Зоран Заев, поранешниот министер за земјоделство Љупчо Николовски и поранешниот министер за здравство Венко Филипче.
Од партијата наведуваат дека по „камуфлирањето на кусокот“ од 2.000 тони жито на владина седница, во 2022 година компанијата „Тргопродукт“, позната по брендот „мамас“, добила грант од 1,4 милиони евра. Според ВМРО-ДПМНЕ, тоа бил еден од најголемите грантови од ИПАРД-програмата во тој период.
Во соопштението се поставуваат прашања за тоа дали, како што тврдат, Николовски интервенирал во процесот на доделување на средствата и дали станува збор за „меѓусебни договори“ и злоупотреби со јавни пари.
Од ВМРО-ДПМНЕ побараа Јавното обвинителство да отвори постапка и да ги истражи наводите. Воедно, партијата оцени дека, според нив, Николовски и Филипче се дел од „корумпирана структура“ и упати критики кон СДСМ.
