МВР и институциите на системот ги доставиле сите потребни докази и информации за несреќата во Кочани до Јавното обвинителство (ЈО) уште пред еден месец. МВР ги има обезбедено сите докази по кои постапува ЈО и презема акции, велат од ВМРО-ДПМНЕ.
„Задача на ЈО, врз основа на обемната документација за случајот која им е предадена е да ја лоцираат вината и да подигнат обвиненија за секој еден за кој сметаат дека на било кој начин е виновен за пожарот и смртта на децата во Кочани. Ниту еден полицаец, функционер, или кој и да е граѓанин кој имал допирна точка со предметот не е изоставен и се е опфатено во документацијата. Сериозен е обемот на документацијата, фактот дека во овој случај се опфатени над 60 лица, од министри, преку МВР, институциите, бизнисмени, градоначалници, секој еден кој можел да има вина е доказ за тоа. Огромна е разликата од МВР сега и од МВР под водство на Спасовски и СДС“, велат од ВМРО-ДПМНЕ.
Според партијата, поранешниот министер за внатрешни работи Оливер Спасовски и СДСМ биле опортунисти и секоја околност и ситуација ја искористувале за извлекување сопствена полза и корист или за теснопартиски интерес.
„СДС да не бидат дволични и да кажат колку лица беа опфатени со истрагата за Модуларната болница, колку во Беса Транс и Ласкарци? Нула. Сега одговорност има за секој без разлика кој е и од каде е“, децидни се од ВМРО-ДПМНЕ.
