На сите обвинети на товар им се става кривичното дело тешки дела против општата сигурност, и тоа за оној дел што се однесува на непостапувањето на службените лица во заштита од несреќа. Им се закануваат казни од 3 до 20 години. Судскиот процес ќе го суди Дијана Груевска Илиевска, која веќе се изјасни дека не сака да биде снимана и фотографирана на утрешниот судски процес.
Сите вклучени во постапката ги очекува долг и тежок судски процес, а над 200-те оштетени што загубија деца и роднини во трагедијата, бараат правда од надлежните.
Обвинети се газдата на „Пулс“, Дејан Јованов – Деко, неговиот син Михајло и неговиот брат Тодор, како и Митко Стојанов, директор на фирмата ММММ кафе, на чие име била издадена една од лиценците на т.н. дискотека. Меѓу обвинетите се и сопственикот на објектот Гроздан Милковски и Милка Едровска од „Венци проект“, која го подготвила проектот за т.н. дискотека.
На обвинителна клупа ќе седнат и поранешните министри за економија Крешник Бектеши и Ваљон Сарачини, како и поранешната државна секретарка во Министерството за економија Размена Чекиќ Дуровиќ, заедно со пет службеници што издале лиценци за „Пулс“.
Обвинети се и тројцата поранешни градоначалници на Општина Кочани – Ратко Димитровски, Николчо Илијев и Љупчо Папазов – како и тројца инспектори од Општината. Меѓу обвинетите се и поранешните директори на Дирекцијата за заштита и спасување (ДЗС) Шабан Салиу, Аднан Џаферовски, Беким Максути и Џеват Селами, како и еден инспектор од институцијата.
Одговорност ќе се бара и од четворица службеници од Државниот пазарен инспекторат, како и од директорот на агенцијата за обезбедување „Рубикон“, Јане Јанчевски, и четворица вработени во агенцијата. Пред извесно време беше поднесено и обвинение за вистинскиот сопственик на „Рубикон“, Александар Нацев, кое сè уште не е одобрено.
Во Основното јавно обвинителство се води предистрага и за други лица вработени во Државниот пазарен инспекторат, Управата за јавни приходи и други институции, а Обвинителството за гонење организиран криминал и корупција спроведува истрага за 13 полициски службеници, за кои обвинение треба да биде поднесено следниот месец.
