Како што соопштија од Уставниот суд ваквите изјави на поранешниот претседател Пендаровски не се точни и не кореспондираат со фактичката состојба.
„Имено, не станува збор за ‘подносител кој е непознат за јавноста’, туку за 13 иницијативи поднесени од 45 подносители, меѓу кои има и политички партии, професори, адвокати, здруженија и граѓани. Оваа информација во повеќе наврати изминатите години е јавно објавена од страна на Судот, во рамки на заложбите за транспарентност. Судот исто така укажува дека, имајќи ја предвид сензибилизираната јавност за овој предмет, високиот степен на јавен интерес, особено е значајно јавни личности или лица кои вршеле високи државни функции и може да придонесат за креирање на јавната перцепција, да се воздржат од изнесување неточни или непроверени информации, без разлика дали се наменети за домашната или меѓународната јавност“, реагираат од Уставниот суд. .
Дополнително, велат оттаму, прејудицирањето на одлуката на Судот, како и изнесувањето претпоставки за можните последици од одлучувањето, претставува несоодветен пристап кој може да влијае не само врз угледот на Судот, туку и врз перцепцијата за правниот поредок и институционалниот интегритет на државата.
„Уставниот суд ја информира јавноста дека во конкретниот предмет не е донесена одлука и дека Судот за овој предмет, исто како и за сите останати ќе постапува во согласност со Уставот, врз основа на сите релевантни факти, аргументи и правни норми“, велат од Уставниот суд во денешната реакција на изјавата на поранешниот претседател Стево Пендаровски.
