Македонија беше претставена како држава со автентична култура, недопрена природа, примамлива гастрономија, земја која има врски со светот, за што зборуваат и податоците – во првите пет месеци од 2025 година бројот на германски туристи што ја посетија Македонија порасна за 219 %, односно над 23.000 Германци.
Како што информираат од Министерството, во рамките на саемот на посетителите им било претставено и богатото културно наследство на нашата држава – археолошките локалитети, недвижните културни добра, артефактите, музејските поставки, кои се непобитни показатели за нашето културно-историско минато.
„Претставувањето на саемот е уште една иницијатива поттикната од воспоставената соработка со Германскиот археолошки институт и Археолошкиот музеј од Франкфурт, што неодамна беше официјализирана и со потпишувањето на билатерални документи со Министерството за култура и туризам и Музејот на град Скопје“, велат од Министерството за култура и туризам.
Посетителите на саемот имаа можност да ја проследат и изложбата на Музејот на град Скопје „Масовната гробница во Скупи – една темна страна на римската историја“, која во Археолошкиот музеј во Франкфурт била отворена минатата година, а досега ја посетиле над 10.000 посетители.
На свечениот прием што бил организиран во чест на претставувањето на нашата држава присуствуваа државниот секретар во Министерството за култура и туризам, Марија Станчевска-Ѓоргова, амбасадорот Илбер Села, директорот на Археолошкиот музеј, д-р Волфганг Давид, директорот на Музејот на град Скопје, д-р Панче Велков, и други гости.
