Овие инциденти официјално ги потврдуваат и од МЖ инфраструктура. Тие велат дека за сите овие инциденти редовно се известува и полицијата, но засега нема некое значително намалување на бројот. Мотивот на дел од овие инциденти е ситен криминал, топење на знаците и на бакарот од каблите за мала заработувачка. Но, инцидентите со поставување на камења на пругите и вртење на знаците во спротивен правец, може навистина да предизвикаат сериозни последици.
Секој ден сме сведоци на неодговорно однесување на луѓе кои во континуитет ја доведуваат во прашање безбедноста на железничката инфраструктура, велат од јавното претпријатие Македонски железници инфраструктура.
„Се поставуваат камења, се вадат знаци од пруга, се краде кабел од пруга… Oва е надвор од памет и може да биде акт на луѓе кои не размислуваат што може да предизвика ваквото нивно недолично и неодговорно однесување. Со ваквите постапки, неодговорните не се свесни за несаканите последици кои може да ги предизвикаат, не само големи материјални штети, туку и загрозување на човечки животи. Многупати сме упатувале апели и сме организирале кампањи со цел информирање на луѓето, особено младите за опасностите и последиците од таквите постапки.
Инциденти на пругата Битола – Жабени во изминатиот период се случуваа, и сите такви инциденти, па и овој, се пријавуваат во полиција и останува полициските служби да ги откријат сторителите на вакви катастрофални постапки и да бидат најстрого казнети. За постапки со кои намерно се загрозува железничкиот сообраќај треба да има многу високи и строги казни. Секогаш ги повикуваме и охрабруваме граѓаните да бидат општествено одговорни и да пријавуваат сомнителни постапки од каков билo карактер да се“, велат од МЖ инфраструктура.
Од МВР за МКД.мк кусо одговорија дека се преземаат мерки за расчистување на овие случаи.
„Во врска со пријавени случаи за оштетување на железничката патна инфраструктура , веднаш по пријавувањето од страна на полициски службеници е излезено на лице место, констатирана е фактичката состојба и се преземаат мерки за расчистување на случаите и пронаоѓање на сторителите“, велат од МВР.
Во последниот период овие инциденти се зачестени на пругата Битола – Жабени.
Од МВР не добивме никаков одговор за тоа што се презема против овие сериозни инциденти.
Пред неколку дена директорот на ЈП МЖ инфраструктура“, Синиша Ивановски за ТВ21 изјави дека еден од најголемите проблеми со кои се соочува железничката инфраструктура во Македонија се честите кражби на терен.
„Имаме страшни проблеми на терен со чести кражби, кражби кои што за да продадат железо за стотина евра прават десетици илјади евра штета. Се намалува безбедноста во сообраќајот. Јас лично ќе инсистирам, целиот Коридор 10, на новата пруга од двете страни да има голема непристапна ограда за да ги намалиме овие немили настани. Кражбите се случуваат на дневна база“, предупреди Ивановски.
A.Д.
