„Осомничениот како службено лице, вечерта на 30.3.2025 година на паркинг просторот пред хотел во Велес се сретнал со неповикано лице – сведок во постапката и му покажал службени документи на МВР, што претставуваат службена тајна. Притоа му дозволил на сведокот истите да ги снима, кажувајќи му кој документ за што се однесува. На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите. Ценејќи ги околностите јавниот обвинител утврди дека се исполнети условите, па на судијата на претходна постапка при Основен кривичен суд Скопје му предложи на осомничениот да му определи мерка притвор во траење од 30 дена, кој предлог беше прифатен од судот“, информираа од ОЈО ГОКК.
За ова кривично дело предвидена е казна затвор од една до 20 години.
Од Основното јавно обвинителство за гонење на организиран криминал и корупција укажуваат дека ниту луѓето, ниту документите во овој предмет, не се поврзани со криминалната групата од Грчец, како што во текот на вчерашниот и денешниот ден објавија дел од медиумите.
Полицаецот од Шестата управа во Министерството за внатрешни работи, кој до вчера беше дел од обезбедувањето на премиерот Христијан Мицкоски се наоѓа во притвор во затворот Скопје, потврди директорот на установата, Бобан Утковски.
