Со меморандумот, како што информираат од МВР, се утврдува рамка за заедничко дејствување во насока на примена на европските стандарди преку зголемување на сензибилитетот и капацитетите на полициските службеници, унапредување на процедурите за постапување и обезбедување ефикасна и навремена заштита на жртвите, со посебен акцент на спречување нивна ревиктимизација.
„Наш приоритет е да изградиме систем, кој навремено, ефикасно и со целосно разбирање ќе одговори на потребите на жртвите на родово базирано насилство. Со оваа соработка вложуваме во знаење, стандарди и координација затоа што заштитата на жртвите не е само обврска, туку и наша заедничка одговорност како институции и како општество“, истакна министерот Тошковски.
Соработката опфаќа реализација на обуки, семинари, конференции и други активности насочени кон зајакнување на институционалниот одговор, како и воспоставување координиран пристап меѓу полицијата, здравствените установи, центрите за социјална работа, Јавното обвинителство и граѓанскиот сектор.
Во рамките на меморандумот ќе се работи и на унапредување на подзаконската регулатива и воспоставување унифицирани стандарди за постапување во сите фази на заштита на жртвите, како и на континуирана размена на искуства и најдобри практики.
Дополнително, Министерството ќе ја поддржи промоцијата на националната СОС-мобилна бесплатна линија 141-700 за жени жртви на семејно и родово базирано насилство преку своите комуникациски канали.
МИА
