„Дека компанијата не е причина за ваквите состојби, покрај другото, зборуваат и фактите од последните неколку дена. Имено, поради редовен ремонт двете печки не работат – едната од лани на 20 декември, а втората од петокот на 16 јануари. И покрај тоа што Титан Усје целосно не работи, во петокот на 16 јануари највисоката вредност на ПМ 10 честичките достигна 275 микрограми на кубен метар, во саботата (17 јануари) – 250, во неделата (18 јануари) – 143, во понеделникот (19 јануари) – 190 и вчера, во вторник (20 јануари) – 221 микрограми на кубен метар. Оваа состојба се потврдува секоја година.
Титан Усје е компанија која не само што работи согласно законите и е носител на А-интегрирана дозвола, таа е под континуиран 24-часовен независен мониторинг на излезните гасови од оџаците, а резултатите од мерењата се јавно достапни преку неделни извештаи. Мерењата на оџаците во Титан Усје се одвиваат согласно законската регулатива која ја пропишуваат институциите и е усогласена со европските директиви. Дека нашето работење не е поврзано со состојбите со амбиенталниот воздух во Скопје зборува и фактот дека и кога компанијата не работи, загадувањето е високо.
Како компанија која е дел од интернационална групација, Титан Усје во континуитет инвестира во модернизација на технолошките процеси. Изминатите шест години инвестициите надминаа 36 милиони евра, од кои 4,5 милиони евра беа наменети за намалување на влијанието врз животната средина.
Искрено веруваме во потребата од еднаков третман на сите ентитети во земјата и согласно принципот на владеењето на правото очекуваме нашето работење да се опсервира и оценува низ призмата на стручноста и законите, а не преку лични и паушални ставови.
Остануваме отворени за конструктивен дијалог со сите релевантни партнери во насока на изнаоѓање на трајно решение во интерес на сите“, се вели во денешното соопштение на Титан Усје.
