Пред судот беа изведени докази поврзани со претрес на патничко моторно возило „опел“, со скопски регистарски ознаки, управувано од еден од обвинетите. Според презентираните материјали, при прегледот под возачкото седиште биле пронајдена цилиндрична кутија и кесичка со бела прашеста материја.
„Извештајот од вештачењето од 10.1.2025 година утврдува дека белата прашеста материја, пронајдена во количина од 31 грам кај лицето, претставува кокаин“, беше истакнато од страна на јавната обвинителка Верица Бержетска-Крстевска.
Во продолжение на доказната постапка јавната обвинителка презентира и резултати од ДНК-анализа на пронајдените предмети.
„Извештај од вештачење на којшто се утврдени траги на крв, од горниот дел од внатрешната површина на една од кесичките, тоа е една прашкаста материја, поврзана со лицето во ДНК-профил од еден од обвинетите“, наведе Бержетска-Крстевска.
За истото лице бил извршен увид и во наредби за претрес на дом, при што бил одземен мобилен телефон.
Во однос на комуникацијата меѓу обвинетите, беа презентирани листи од телефонски разговори остварени во август 2024 година. Според доказите, регистрирана е комуникација меѓу дел од обвинетите, при што се лоцирани базните станици во реонот на населбите Керамидница и Дебар Маало.
Меѓу презентираните докази беше и записник од август 2024 година за извршен преглед на лице во Скопје, кај кое, според наводите, била пронајдена кесичка со растителна материја скриена во презерватив. Вештачењето потврдило дека се работи за 16,5 грама марихуана. Дополнително, беше презентиран и доказ за пронајдена бела супстанција во возило „лексус“ за која вештачењето покажало дека се работи за 4,17 грама кокаин.
Групата, според обвинението, дејствувала во периодот од јануари 2024 до јануари 2025 година и била добро организирана, со јасно дефинирани улоги – од набавка до продажба на кокаин и марихуана. Обвинителството тврди дека првообвинетиот Раде Трајковски-Штекли се јавува како организатор и координатор, кој бил во контакт со лица од странство и домашни посредници за првична набавка на кокаин, давајќи насоки и упатства за проширување на мрежата.
Според доказите на Обвинителството, дрогата се чувала во изнајмени станови, а се продавала по цени од 4.500 до 6.000 денари за грам кокаин и 200 до 300 денари за грам марихуана. Комуникацијата се одвивала преку апликации за заштитена комуникација, како „Снепчет“, а клучни докази биле обезбедени преку систем за анализа на мобилни телефони.
На почетокот на судскиот процес првообвинетиот Раде Трајковски-Штекли изјави дека не го разбира обвинението, а другите обвинети се изјаснија дека не се чувствуваат виновно. Одбраната на Трајковски истакна дека ќе докаже оти тој не формирал, ниту организирал криминална група и дека не постојат докази дека давал инструкции посочувајќи дека наводите на Обвинителството се базираат на претпоставки.
Обвинението првично опфаќаше 16 лица, од кои некои веќе склучија спогодби и добија затворски казни, а за четворица обвинети постапката беше раздвоена по признавање на вината.
