„Наместо предложеното зголемување од 7,66 отсто што ЕВН ХОМЕ го достави во одлуката, РКЕ по спроведени анализи и повторни пресметки, одлучи во првиот блок да има корекција од 2,45 проценти. Во вториот блок цената ќе се зголеми за 2,87 отсто, додека предлог зголемувањето на ЕВН ХОМЕ е 8,54 проценти. Во третиот блок цената ќе се зголеми за 3,32 отсто, иако беше предложено да има зголемување од 9,63 проценти и во четвртиот блок зголемувањето е 3,84 отсто, наместо предложените 11,86 проценти“, соопшти денеска претседателот на РКЕ, Марко Бислимовски.
Тој посочи дека поскапувањето за 85 отсто од домаќинствата ќе биде за 2,28 отсто или за 57-70 денари на просечната сметка.
„За 63,86 отсто од домаќинствата или 517.400 кои имаат потрошувачка само во првиот блок и во евтина тарифа зголемувањето на месечната сметка е 2,28 проценти. За 20,97 проценти или 169.900 домаќинства кои имаат потрошувачка во првиот и вториот блок зголемувањето на месечната сметка е 2,59 отсто. За 1,73 отсто или 14.000 домаќинства кои имаат потрошувачка во прв, втор и трет блок, зголемувањето на месечната сметка е 2,79 отсто и за 0,55 отсто или 4.400 домаќинства зголемувањето на месечната сметка е 3,22 процента“, информира Бислимовски.
Едно домаќинство од прв блок, со потрошувачка 210 киловат/часови и евтина тарифа од 227 киловат/часови ќе има повисока месечна сметка за 57 денари или 2,28 отсто, домаќинство од блок 1 со 210 киловат/часови, од втор блок со 420 киловат/часови и евтина тарифа од 682 киловат/часови ќе има повисока сметка за 70 денари или 2,59 отсто, додека домаќинствата од прв, втор и трет блок кои се вкупно 14.000 или 1,73 отсто од потрошувачите ќе имаат повисока месечна сметка за 2,79 отсто или 370 денари. За домаќинства во прв, втор, трет и четврти блок кои се вкупно 4.400 или 0,55 отсто, ќе имаат за 3,22 отсто повисока сметка или за околу 900 денари. Вкупно 517.400 домаќинства или 63,86 отсто ќе имаат зголемување од 2,28 отсто. Тие во прв и во втор блок се 20,97 отсто или 169.900 домаќинства со 2,59 отсто поскапување.
Тој напомена дека и покрај претходното намалување на мрежарината за 4,96 отсто, надоместокот од 200 денари останува дел од сметките и нема да биде укинат.
„Ако се укине надоместокот од 200 денари, цената за мрежарина која сега е 2,03 денари, ќе биде 2,6 денари, односно ќе се зголеми за 28 проценти. како резултат на тоа, ако се укине надоместокот од 200 денари, првиот блок ќе се зголеми за дополнителни 8,46 отсто, вториот блок за 7,19 проценти, третиот за 5,77 отсто., четвртиот за 2,69 и евтината тарифа за 13,51 процент. Со оглед на овие податоци, РКЕ црвсто останува на ставот дека надоместокот од 200 денари нема поптреба да биде укинат“, објасни Бислимовски.
Во однос на евтината тарифа, ЕВН Хоме предложи зголемување за 3,96 отсто, додека РКЕ одлучи да се корегира за 2,5 проценти.
