„Вчера направивме уште еден значаен чекор напред! Одржавме две важни средби, со министерот за внатрешни работи Панче Тошковски и потоа со градоначалниците на Аеродром – Дејан Митески и на Гази Баба, Бобан Стефковски. Добиени се позитивни сигнали и подготвеност за соработка.
Денеска следува голема заедничка средба со претставници од повеќе институции, на Министерството за животна средина, со градоначалниците на општините Аеродром и Гази Баба, со Министерството за внатрешни работи, како и со Министерството за труд и социјална политика. Ова е силен знак дека нашите напори да донесеме вистинска промена се слушаат и носат резултати. Продолжуваме истрајно и обединето”, соопшти иницијативата Стоп за Вардариште преку социјалните мрежи.
Иницијативата бара депонијата која го загадува воздухот во Аеродром и Гази Баба да биде целосно затворена пред изборите, да биде физички обезбедувана и оградена, да се престане со одложување на отпад, да бидат поставени камери чии снимки ќе може јавноста да ги гледа, како и иселување на нелегално населените луѓе и нивно згрижување на друга локација.
Протестите започнаа по големиот пожар на Вардариште на 31 август кога воздухот во делови од Аеродром и Гази Баба неколку дена беше екстремно загаден. Протестите се одржуваат секој ден од 18 до 19 часот на крстосницата кај Парк Авионче во Аеродром, пред мостот Близнак, а полицијата ја обезбедува блокадата на сообраќајот. Во три наврати се одржаа блокади на истата крстосница и во други термини како форма на дополнителен притисок за прифаќање на барањата од страна на локалните и централните власти.
П.Џ.
