Според информациите, објектот во моментот на интервенцијата бил во приземје, во карабина фаза, со јасна намера за надградба на уште еден кат. И покрај тоа што градежниот инспектор претходно донел решение за стопирање на градбата и затворање на градилиштето, сопственикот не постапил по решението и продолжил со градежни активности, што било основ за отстранување на објектот.
Акцијата започнала околу 05:00 часот наутро, а, како што информира Стефковски, била спроведена со претходна координација со Министерството за внатрешни работи, со цел да се обезбеди непречено и безбедно спроведување на законските постапки.
„Компромис со почитувањето на законот нема“, порача градоначалникот, нагласувајќи дека Општина Гази Баба ќе продолжи со доследна примена на законите и со еднаков однос кон сите граѓани.
Стефковски упати апел до граѓаните да не започнуваат градба без соодветно одобрение и да ги почитуваат законските процедури. Според него, воспоставувањето ред во урбаното планирање е клучно за заштита на јавниот интерес и за одржлив развој на општината.
