„Утре има ребаланс на буџетот во кој се предвидени и средства за продолжување на јавниот градски превоз за наредни четири месеци, заклучно со октомври годинава. Вклучени се сите релации и онаа до село Клечовце. Ќе побарам поддршка и со оглед на заинтересираноста на граѓаните се покажа како мерка од исклучително значење за граѓаните“, рече претседателката на советот Ивана Ѓорѓиевска.
Опозицијата реагираше и побара да се субвенционира половина од определената сума, останатите средства да се вложат за други потреби на кумановци. Бесплатниот превоз го користат жителите од приградските средини, а дел од граѓаните сметаат дека е прескап проект кој е во интерес исклучиво на жителите од неколку населби.
„Имаме реакции, стигнуваат и до нас, дека не е климатизирано, на одредени релации има повеќе патници. Реакции има и од средношколците. По истекувањето на договорот на тендерска постапка може да се воведат и некои линии на овие релации за кои има најмногу интерес“, изјави Ѓорѓиевска.
Дел од граѓаните кои го користат пак велат дека некои ја злоупотребуваат мерката, се возат постојано, создаваат метеж и бараат од превозниците, учениците да имаат предност при користење на превозот во термините кога почнува првата и втората смена во средните и основните училишта од градот.
Општината ја правда одлуката како оправдана, укажувајќи дека се ублажила енергетската криза подобрен е на семејниот буџет, намален е на сообраќајниот метеж во централното градско подрачје и мерката има позитивни ефекти во однос на намалување на аерозагадувањето.
Според податоците на општината превозот го користат од 12 до 16.000 жители.
