Слаб снег кој не се задржува на коловозот провејува на планинските превои Попова Шапка, Стража, Маврово–Брод и Буково. И покрај ваквите временски услови, сите патни правци во моментов се проодни.
Од ЈП Македонијапат предупредуваат дека на одредени патни правци кои минуваат низ усеци и клисури можна е појава на поситни одрони, поради што се препорачува зголемено внимание при возење.
Од претпријатието апелираат до возачите да управуваат внимателно со возилата, да ја почитуваат поставената сообраќајна сигнализација и да ја прилагодат брзината според условите на патот.
Дежурните екипи на ЈП Македонијапат се постојано на терен и работат на одржување на сите патни правци проодни и безбедни за сообраќај.
Вицепремиерот и министер за транспорт Александар Николоски вечерва изјави дека тимови на Македонија пат се на терен и ги одржуваат чисти и проодни патните правци низ земајва.
Тој нагласува дека на ниво на држава сите патни правци се проодни и никаде нема застој, но истовремено апелира до граѓаните, внимателно да ги користат патиштата, да ја прилагодуваат брзината согласно условите на теренот.
„Многу битно, да користат зимски гуми и секаде каде што е потребно опрема, од типот на ланци и сето она што е потребно и што го препорачуваат надлежните, со цел да имаме сигурен и безбеден сообраќај“, истакна Николоски.
Министерот за транспорт потенцира дека се очекува оваа ситуација ќе се задржи и следните денови, и најавува дека ќе бидат во постојана комуникација и координација, со цел да сообраќајот непречено се одвива на ниво на држава и граѓаните стигаат онаму каде што е потребно, особено после празниците, бизнисот да може непречено да се одвива.
„Уште еднаш, апел до граѓаните за одговорно возење и за почитување на сите правила кои што ги имаат надлежните и честитки до сите оние кои деноноќно, по 24 часа се обидуваат да се справат со овие снежни наноси“, изјави вицепремиерот и министер за транспорт Николоски.
