Додаде дека Народна банка не е институција која ги определува каматните стапки, но рече дека укажуваат на една пракса во светот која се заснова на проценките на ризикот дека семејствата коишто за прв пат купуваат стан и живеат во него, или куќа се помал ризик од аспект на сервисирање на обврските. Оттука, тие добивале поповолни услови насекаде во светот од страна на комерцијалните банки и тоа тој го очекува од нашите комерцијални банки.
На дополнително прашање, каква е реакцијата на банките и дали се согласиле да биде поевтина понудата за купување прв стан, Славевски одговори дека сè уште нема ниту официјална, ниту неофицијална најaва од страна на банките.
„Немаме, треба да ги слушнеме, најверојатно прават проценки и пресметки. Немам ниту официјална, ниту неофицијална најава од страна на банките. Мислам дека сè уште е рано“, рече гувернерот.
На уште едно новинарско прашање дека банкарскиот сектор има една друга логика – што е поголемо учеството, поповолни се кредитите, Славевски смета дека сè е релативно.
„Еве земете вие сега ако можете со 10 илјади евра во денарска противредност за помал стан, кој не мора да биде во центарот на Скопје и влезете во решавање на своето сопствено станбено прашање. Ако ви се потребни наместо 10, 20 илјади евра, вие ќе треба да ги позајмите од некаде за што ќе плаќате камата или да речеме од своите најблиски, роднини, пријатели или потрошувачки кредит, што се има трошок. Сакам да кажам дека нема ниту еден аргумент, дека ова не е поповолно или не би било поволно за некој што го нема решено станбеното прашање“, посочи гувернерот Трајко Славевски.
