Од Иницијативата велат дека потрошувачката на вода во Скопје моментално изнесува 350.000 метри кубни (м3) на ден, што е без преседан во изминатите години.
„Скопје троши неверојатни 4.000 литри во секунда, додека максималните капацитети од дотокот од Рашче и системот Лепенец-Нерези не можат да ја задоволат оваа потреба. Ако се продолжи со интензивно користење на изворите, тие би можеле трајно да се изгубат.
Потребни се итни мерки, вклучувајќи изградба на нови пумпни станици, примарна мрежа и резервоари и обезбедување алтернативни извори на вода за Скопје, како Врело или Патишка река“, велат од О2 Иницијативата.
Покрај тоа, од Иницијативата предлагаат и забрани за користење на питка вода во индустријата, како и за миење на возила. Поливањето на зеленилото и миењето на улиците, велат оттаму, исто така треба да се врши со техничка вода.
„За време на сушните периоди, потребни се дополнителни забрани за полнење на приватни базени и миење на дворови. Ограничувањето на полевањето на градините на секој втор ден, воведување прогресивно наплаќање на водата, и високи парични казни за диви приклучоци се предлози кои можат да помогнат. Лимитирање на 50-80 литри вода дневно по жител, по потреба. Овој проблем е од витално значење и треба да биде приоритет во секоја кампања за локалните избори, а не само пусто ветување. Обврските за изградба на одржлив и безбеден систем за водоснабдување мора да бидат во фокусот на вниманието“, велат од О2 Иницијативата.
