Од УХМР информираат дека особено силно невреме има во регионот околу езерото Младост и делови од Велес, каде врнежите од дожд и град се интензивни, придружени со грмежи и засилен ветер. Слична состојба е регистрирана и помеѓу Штип и Кочани, во регионот на Горни и Долни Балван, како и во Прилепскиот регион, вклучувајќи ги подрачјата помеѓу Прилеп и Росоман, Неготино, Демир Капија, Виница и Делчево.
„Од запад кон Скопје се движи нестабилна облачна маса проследена со пороен дожд, грмежи, засилен ветер и појава на град“, предупредуваат од УХМР, додавајќи дека ваквите услови може да предизвикаат штети од поголем обем.
Температурите измерени попладнево варираат од 11 Целзиусови степени на Попова Шапка до 33 степени во Демир Капија, покажуваат најновите мерења на УХМР.
Надлежните служби ги повикуваат граѓаните на зголемена претпазливост, особено во областите каде што се очекува невремето да продолжи.
