На средбата се разговарало за заедничката промоција и зголемената побарувачка за македонските туристички дестинации од страна на потенцијалните албански туристи.
Оценето е дека албанските туристи го посетуваат охридското крајбрежје, мавровско – дебарскиот крај и културните знаменитости на регионот, но и семејните врски се нераскинлив дел од посетата.
„Ставот на инволвираните туристички професионалци од регионот е дециден, само со приоретизирање на одржливоста, регионот може да поттикне меѓусебната поврзаност, подобрување на глобалната привлечност и безбедна долгорочна одржливост на конкурентниот пазар“, објави Македонската амбасада.
Македонската туристичка понуда е дел од Саемот за туризам и патувања што се одржува во Тирана, Албанија.
Како што посочуваат од Агенцијата за промоција и поддршка на туризмот, саемското претставување отвара можности за регионална туристичка и бизнис-поврзаност на земјите од Западен Балкан, како брзорастечки туристички пазар за светските патувачи.
„Одлично место за промоција и зголемена видливост на дестинациите, кои нудат уникатни идеи за патување. На одржаните состаноци и средбите со туристичкиот сектор на Албанија и регионот, Агенцијата за туризам има можност да формира нови партнерства, да се продлабочи соработката со веќе постоечките, и да се дознае за иновациите, технологиите и стратегиите што го обликуваат туризмот во 2025 година“, пишува во објавата од Агенцијата.
Инаку, во фокусот на годинешниот Саем во Албанија е ставен одржливиот социо-економски и еколошки напредок.
Со растот на побарувачката за еколошки и културно одговорни патувања, Западниот Балкан е уникатно позициониран да стане водечка дестинација за одржлив туризам.
„За да се постигне ова е потребно зајакнување на партнерствата, промовирање на еколошки иницијативи и зачувување на културата. Потребно е усвојување на глобалните стандарди, усогласени со европските и меѓународните одржливи туристички сертификати со обезбедување поддршка од ЕУ“, додаваат од Агенцијата.
