„Во 2023 година, за време на СДСМ, поддршката за земјоделството изнесуваше 8,3 милијарди денари. Сега, таа се намалува на 6,7 милијарди – односно над 30 милиони евра помалку“, се наведува во реакцијата на СДСМ.
Партијата дополнително посочува дека Владата ја укинува и авансната исплата од 30%, која досега се исплаќаше предвреме две години по ред. Истовремено, се кратат и средствата за програмата за рурален развој, а укинувањето на лимитот за директни плаќања, според СДСМ, оди во прилог на големите компании, на штета на малите производители.
„Овие одлуки покажуваат јасна намера да се укинат сите досегашни реформи и да се наруши правичната распределба на поддршката во земјоделството“, велат од СДСМ.
Дополнителна причина за загриженост, според нив, е и предупредувањето од Европската Унија за ризик од слаба искористеност на ИПАРД-средствата, поради заминувањето на 136 вработени од Министерството за земјоделство и Платежната агенција.
„Јасно е – ништо од изборните ветувања. ВМРО-ДПМНЕ им сврте грб на земјоделците“, стои во соопштението.
