Системот ќе биде управуван од германски и холандски војници и првично ќе биде распореден на аеродромот Слиач во центарот на земјата за да помогне во зајакнувањето на одбраната на источното крило на НАТО поради руската инвазија на Украина.
Системот Патриот ќе биде дел од новата борбена група на НАТО во Словачка, која граничи со Украина.
„Среќен сум што можам да потврдам дека првите единици задолжени за распоредување на системот за противвоздушна одбрана Патриот постепено пристигнуваат во Словачка“, објави министерот за одбрана Јарослав Над на Фејсбук.
Над рече дека системот Патриот ќе биде дополнување, а не замена за советскиот систем С-300 што го користи Словачка.
„Системот ќе биде привремено распореден во воздухопловната база Слиач, се разговара за други локации… така што безбедносниот чадор ќе покрива што е можно поголем дел од територијата на Словачка“, рече тој.
Министерот минатата недела рече дека Словачка е подготвена да го даде својот систем С-300 на Украина доколку и кога ќе добие соодветна замена.
Тој во неделата повтори дека Словачка бара замена за С-300 поради неговата старост, перформанси и зависност од Русија.
Русија предупреди на Украина да не ѝ се испраќаат напредни системи за противвоздушна одбрана и се закани дека ќе ги нападне магацините со оружје испратени од Запад.
