Сопственикот на ФК Челзи – кој досега веќе оздравел – наводно претрпел болки во очите и лупење на кожата.
Се вели дека такви симптоми имале и двајца украински мировни преговарачи, пренесува Би-би-си.
Волстрит џурнал објави дека наводното труење било организирано од тврдокорни луѓе во Русија, кои сакале да ги саботираат преговорите.
Состојбата на Абрамович и на украинските преговарачи, меѓу кои е и украинскиот пратеник Рустем Умеров, е подобрена по инцидентот на 3 март, вели весникот.
Извор близок до Абрамович изјавил за Би-би-си дека тој претрпел симптоми на потенцијално труење. Тие рекле дека тој сега закрепнал и дека продолжува со преговорите во обид да ѝ се стави крај на војната во Украина.
Абрамович патуваше меѓу Москва и Киев на неколку рунди разговори во почетокот на месецов.
Наводно, рускиот милијардер за време на патувањето се сретнал со претседателот Володимир Зеленски, но украинскиот лидер не бил погоден и неговиот портпарол немал информации за инцидентот.
Истражувачката новинарска група „Белингкет“ рече дека Абрамович и преговарачите претрпеле симптоми „слични на труење со хемиско оружје“.
Симптомите вклучуваат „воспаление на очите и кожата и продорна болка во очите“, објави Белингкет.
Портпаролот на Абрамович претходно изјави дека тој игра „ограничена“ улога во обидот да се најде „мирно решение“ меѓу двете земји.
Абрамович беше предмет на санкции од британската влада претходно овој месец поради неговата наводна поврзаност со рускиот претседател Путин.
