Кина ги предупредува САД за воената стратегија во Азија

Кинеските државни медиуми им порачаа на САД да не „покажуваат многу мускули“, откако Вашингтон откри дека ќе има ревизија на одбраната и дека фокусот ќе биде преместен кон азискиот Пацифик. Во еден уреднички коментар, официјалната новинска агенција Џинхуа кажа дека потегот на претседателот Барак Обама да се зголеми американското присуство во регионот може да биде добредојдена инфузија на стабилноста и напредокот. Но исто така коментира дека американскиот милитаризам може да создаде негативни чувства и „да го загрози мирот“. Обама најави дека сака да скрати 450 милијарди долари за да создаде „потенка“ армија. Илјадници војници треба да бидат отпуштени во следната деценија под капата на далекосежната ревизија на американската одбрана. Буџетот за одбрана најверојатно ќе биде намален за дополнителни 500 милијарди долари на крајот на оваа година откако Конгресот не успеа да се договори за намалување на дефицитот и откако долгот на земјата го достигна плафонот во август 2011. Обама изјави дека „воената плима се повлекува“ од Авганистан и дека САД мора да си ја обноват економската моќ. И покрај тоа, тој им изјави на новинарите во Пентагон: „Ќе го засилиме нашето присуство на азискиот дел на Пацификот, а буџетските рестрикции нема да му наштетат на овој кризен регион“. Џинхуа изјави дека улогата на САД може да ѝ помогне на Кина да обезбеди „мирна средина“, која ѝ е потребна за да го продолжи својот економски развој. Но додава: „Додека го засилуваат своето воено присуство, САД треба да се воздржат од покажување мускули, зашто тоа нема да помогне во решавањето на регионалните несогласувања. Ако САД планираат да настапат со своето милитаристичко однесување, ќе бидат како слон во стакларница и ќе го загрозат мирот наместо да ја зголемат регионалната стабилност“. Аналитичарот на Би-би-си Азија Чарлс Сканлон вели дека одлуката на САД да се фокусираат на Азија не би требало да биде изненадување за лидерите на Кина. Сепак, за дел од официјален Пекинг ова може да изгледа како стратегија дизајнирана да се ограничи растечката моќ на Кина. Но коментарот на Пекинг сè уште се чека. Сепак, весникот на Комунистичката партија „Голбал тајмс“ вели дека Вашингтон не може да го сопре растот на Кина и најави дека Пекинг дополнително ќе го развива оружјето со голем дострел за да ја држи американската морнарица на дистанца. Новата американска стратегија ја менува долготрајната доктрина на Пентагон да биде во можност да води две војни истовремено. Сепак, секретарот за одбрана Леон Панета нагласи дека армијата ќе ја задржи способноста да одговори на повеќе закани одеднаш и ќе биде пофлексибилна и поприспособлива од претходно. Обама изјави: „Светот мора да знае – САД ќе ја задржат воената супериорност со оружени сили што се подвижни, флексибилни и подготвени за секакви околности и закани“. Не се најавени конкретни намалувања на бројот на војниците или на програмите за вооружување, тие ќе бидат претставени како дел од федералниот буџет следниот месец. Но се разгледува намалување од 10-15% на армијата и на маринците во следните десет години – сè на сè десет илјади војници, јавија извори од администрацијата на Обама. Првичните реакции на републиканците се негативни. Претседателот на Комитетот за вооружени сили, Хауард Меккеон, изјави дека новата политика е „повлекување од светот под маската на нова стратегија“. „Ова е кукавичка стратегија што ќе ја уназади Америка“, изјави тој.