„Се повикува Советот да му наметне целени санкции на Милорад Додик и на неговите сојузници поради неговите коруптивни активности, континуираните дестабилизации на земјата и поткопувањето на суверенитетот и територијалниот интегритет на Босна и Херцеговина“, се истакнува во амандманот од годишниот извештај на Одборот за надворешни работи на Европскиот парламент.
За амандманот гласаа 504 пратеници, против беа 93, а 72 се воздржаа од гласање.
Амандманот го поддржа мнозинство од групацијата ЕПП, додека хрватски ХДЗ остана со радикалната десница и популистите.
Во амандманот остро се осудуваат „неуставните сецесионистички мерки на властите на Република Српска“, чија цел, како што се наведува, е воспоставување паралелни институции од областа на медицината и медицинските производи, правосудството, одбраната, безбедноста и даночењето.
Со тоа, како што се наведува, се поткопуваат државните структури на БиХ и се создава егзистенцијална закана за нејзиното единство и територијалната целовитост.
Се осудува и „штетната улога на регионалните актери и надворешното мешање на Русија“.
