„По сите манипулации и неправилностите на терен реакциите на Ромите беа дека податоците од овој спроведен попис нема да бидат признати од ромското население. Тоа се докажа и со објавувањето на денешните резултати – процентот на Роми во државата не е 2,53%. Гледајќи ја бројката и нотираните неправилности и манипулации, овој попис го сметаме за невалиден. Во овој период дополнително сме во процес на тестирање на податоци од базите на податоци од државата кои го имаат податокот на етничка припадност. Пописот како статистичка и политичка операција не завршува со објавување на податоците.
Според нашите процени базирани на официјалните државни податоци, од 2002 година до 2020 година вкупниот број на родени Роми изнесува 32.000 Роми, додека бројката на умрени изнесува 8.500. Според овие податоци, природниот прираст изнесува околу 24.000 Роми. Споредбено со другите заедници, без етничките Албанци, Ромите имаат најголем експоненцијален природен прираст. Покрај податоците на родени Роми, податоците за Роми во образовниот систем укажуваат дека во просек 15.000 Роми се ученици во текот на една училишна година. Земајќи го предвид и податокот дека околу 5.000 Роми не се дел од образовниот процес поради различни причини, произлегува дека во државата имаме околу 20.000 деца на училишна возраст Роми. Доколку се земе предвид дека едно ромско семејство брои во просек 5 члена, бројката укажува на 100.000 Роми во државата. За бројката на Роми во државата говорат и податоците од Агенцијата за вработување каде во текот на 2020 година имаме 14.401 активен барател на работа и 3.410 пасивни баратели на работа. Воедно, според нашите податоци постојат околу 10.000 Роми кои не се регистрирани во системот на баратели на работа. Проекцијата и на овој збир укажува дека во државата треба да имаме околу 100.000 Роми.
Процентот од 2,53% Роми или 46.367 Роми резидентно население не е ниту 50% од бројката на Роми која живее во државата. Потсетуваме дека во текот на пописот се регистрираа бројни манипулации на терен со ромското население, се известуваше за попишувачи кои попишуваа Роми под друга етничка припадност и се истакнуваа неправилностите во време на траењето на пописот. Во Велес попишувач велел дека нема Ром/Ромка во пописниот прашалник – попишувачот бил отстранет, но по неколку дена попишувачот бил повторно вратен на терен. Во Дебар, Кичево, Радовиш, Струмица, Виница ромските семејства не беа прашувани за етничка припадност. Во овие градови, особено во Струмица и во Радовиш, статистичката операција беше претворена во операција на манипулација на ромското население. Покрај тоа, постојат и населени места кои поради краткиот временски период не беа попишани“, соопшти Аваја.
