Според граѓаните, сметките се високи, посебно во зимските месеци и бараат и тие да имат увид во броилата.
„Протестираме заради високите сметки. Јас живеам сам во една соба и имам еден ладилник и сметката за струја за минатиот месец ми е 19 илјади денари, а претходниот добив сметка од 14 илјади. Бараме сметките да се намалат и да бидат реални“, изјави Зекри Алиев.
Претставници од протестантите влегоа на разговор со раководството на КЕЦ Струмица и по средбата на насобраните им се обрати директорот на овој Центар, Мартин Димевски.
„Наредниот петок вашите претставници пак ќе дојдат кај нас уште еднаш, а од понеделник до петок наредната недела ако некој смета дека треба да се провери и анализира броилото како што треба во системот ќе бидете примени од 13 до 15 часот во посебна канцеларија“, рече Димевски.
И претставниците на граѓаните кои беа на разговор, потврдија дека наредниот петок повторно ќе се сретнат за да се најде решение и ги повикаа насобраните граѓани мирно да се разотидат.
Инаку, од „Електродистрибуција“ додаваат дека се работи за специфично маало каде има дивоградби и нелегални приклучоци.
Велат дека тие што имаат броила се далечински и не станува збор за нереални сметки, а покрај тоа пред извесно време таму се извршена и реконструкција на мрежата и некои од граѓаните за прв пат добиле броила.
