Настанот во СВР Струмица бил пријавен на 23 март 2025 година во 8:25 часот од страна на мајката на жртвата. Веднаш по добиената пријава биле преземени соодветни мерки и активности од страна на полициски службеници од СВР Струмица-ОВР Радовиш.
„Утврдено е дека машкото лице е А.А.(35) од Радовиш, кој истиот ден во 9:20 часот е лишен од слобода и задржан во Полициската станица Радовиш. Исто така бил извршен службен разговор и со нападнатата жена, во присуство на социјален работник од Јавна установа Меѓуопштински центар за социјални работи Радовиш, при што таа кажала дека видео записот е од јули 2024 година“, се вели во соопштението.
Од МВР појаснуваат дека во овој случај постои сомнение за сторено кривично дело телесна повреда по член 130 став 2 во врска став 1 од Кривичниот закон, каде во став 5 од истиот член стои дека гонењето се презема по поднесување на предлог за гонење. Жртвата изјавила дека не сака да поднесе предлог и дека видеото било доставено од нејзината мајка.
За настанот бил запознаен јавен обвинител од Основното јавно обвинителство Радовиш, по чии насоки биле преземени и понатамошните мерки. Врз основа на преземените мерки, од страна на ОВР Радовиш до Основното јавно обвинителство Радовиш на 25 март 2025 година е поднесена кривична пријава против А.А. поради постоење на сомнение дека сторил кривично дело телесна повреда по член 130 став 2, а во врска став 1 од Кривичниот закон.
МВР наведува дека продолжуваат да се преземаат дејствија за целосно испитување на настанот.
Од Обвинителството велат дека се постапува по поднесена кривична пријава и ќе се утврдува дали во конкретниот случај постои основ за задржување на приведеното лице. Додаваат дека ОЈО и истражните органи постапуваат врз основа на доказите во предметите.
