„Она коешто прво би кажал е дека буџетот за науката е двојно зголемен оваа година, споредено со минатата година. Дали е тоа доволно, бидејќи доаѓам од науката – ќе ви кажам не! Но е секако повеќе од тоа што беше минатата година, мислам дека околу 650,660 милиони денари. Нашата цел е да ја стимулираме науката и во таа насока е и онаа активност на Владата да обезбеди бесплатен пристап на сите научници и млади, но и поискусни на две бази на научни списанија. Ако тоа во минатото се плаќаше и беше тешко достапно, сега веќе го имаат бесплатно. Државата тоа го покри за сите универзитети и очекувам младите научници да продолжат во таа насока да се однесуваат. Односно да ги користат овие бази на научни списанија и да ги следат светските трендови, а со тоа да публикуваат понатаму свои научни трудови. И со тоа да придонесат нашите универзитети да се приближат напред, кон првата илјадарка според Шангајската листа на универзитети, којашто е една од најважните репер листи во светот и очекувам тоа да се случи во овој мандат на оваа влада. Ние како Влада правиме сѐ“, одговори премиерот Мицкоски.
Во однос на економските параметри, премиерот истакна дека е задоволен од резултатите во транспортот и туризмот.
„Апсолутно сум задоволен. Имаме 16 нови дестинации. Буџетот за субвенционирање е зголемен на 250 – 260 милиони денари оваа година, а истиот ќе биде и следната година“, одговори Христијан Мицкоски на новинарско прашање во однос на субвенционираните летови.
Премиерот Мицкоски истакна дека резултатите се видливи и во секторот туризам, бидејќи како што посочи за повеќе од 20 проценти е зголемен бројот на странски туристи во државата во првите 5 месеци од годината.
„Впрочем резултатите се гледаат и во секторот туризам, имаме повеќе од 20 проценти зголемен број на странски туристи во првите 5 месеци од годината. И ова се субвенции на доаѓање, практично на тие летови, не на заминување, и во таа насока ќе продолжиме и во периодот кој што следи“, нагласи Мицкоски.
