Како што соопшти Јавното обвинителство, осомничениот 21-годишник, вечерта на 24 март во Марино, управувал автомобил киа без возачка дозвола и пијан со 0,94 промили алкохол во крвта.
„Брзината на движење на возилото не ја приспособил кон сообраќајните услови и не обрнал внимание на пешакот Оливер Младеновски, кој веќе започнал да го преминува коловозот. Бидејќи не успеал навреме да запре, осомничениот со автомобилот удрил во телото на пешакот и му нанел тешки телесни повреди од кои тој починал. Бидејќи постојат околности кои укажуваат на опасност од бегство, можност осомничениот да ја попречува кривичната постапка со влијание врз сведоците или да стори ново кривично дело, јавниот обвинител до судијата на претходна постапка достави предлог за определување мерка притвор“, се наведува во соопштението на Јавното обвинителство.
