Денешното рочиште за „Титаник” значеше нов, трет почеток одново, поради смена на поротник. Осуммина од обвинетите ја искористија таквата можност и пред судот одговорија дека признаваат вина. Притоа им се извинија на сите луѓе кои биле прислушувани и навредени преку „бомбите“.
Токму Јанкулоска, Јанакиески и Протоѓер беа меѓу најзастапените во прислушуваните разговори кои ги објавуваше некогашниот опозициски лидер Зоран Заев, пред шест години. Вина признаа и Кире Тодоровски, поранешен шеф на кабинетот на Јанкулоска, а потоа вработен во Агенција за разузнавање, како и Мунир Пепиќ.
Јанкулоска пред судот кажа дека ја признава вината во однос на наводите од обинението, но забележа дека постапката за овој предмет не требало да се води, поради даденото помилување од поранешниот претседател Ѓорге Иванов.
И Јанакиески рече дека признава вина за дел од кривичните дела кои му се ставаат на товар, но и тој смета дека „Титаник” не требало да се води поради помилувањето на Иванов.
Мартин Протуѓер кажа дека презема одговорност како морален чин и од тој аспект ја прифаќа вината.
Бришковска, пак, ја прифаќа вината како лична и професионална одговорност од аспек аспект на позициите кои ги извршувала.
Судењето денеска треба да продолжи за оние кои признаа вина, а за останатите обвинети ќе има ново рочиште на 9 март.
Случајот „Титаник” го води судијата Осман Шабани, додека обвинението го застапува обвинителката Лиле Стефанова.
Освен поранешниот премиер Никола Груевски кој е во бегство, во „Титаник” обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.
