„Наместо брза, координирана и силна реакција, владата на ВМРО-ДПМНЕ дозволи пожарите да излезат од контрола. Гориме со денови, нема нова опрема, нема доволно пожарникари на терен“, наведуваат од СДСМ. Тие посочуваат дека над 20% од површината со шуми и пасишта е претворена во пепел, а причината, според нив, е непланирано трошење на државниот буџет и одбивање на предлозите на СДСМ за вложувања во противпожарната заштита.
ВМРО-ДПМНЕ, пак, во своето соопштение се повикува на бројките од регионот. Велат дека пожарите се последица на екстремни температури и суша која го зафатила целиот Балкан и оти, за разлика од земји како Грција, Бугарија, Турција или Албанија, во Македонија нема човечки жртви, ниту значителна материјална штета.
„И додека земјите од регионот бројат жртви, раселени граѓани и изгорени села, во Македонија пожарите се ставени под контрола благодарение на навремената интервенција на службите“, порачуваат од ВМРО-ДПМНЕ. Притоа посочуваат дека ангажирани се пожарникари, припадници на Армијата, хеликоптери и волонтери.
Во меѓувреме, алармантната состојба на терен останува, со десетици активни жаришта, тешко пристапни терени и зголемен ризик од нови пожари поради високите температури и ветровите. И додека институциите и пожарникарите водат битка со огнот, политичката битка меѓу власта и опозицијата се води на друго поле, кој е виновен, кој не реагирал и кој требало да направи повеќе.
