„Хуманитарната акција за спасување на авганистански граѓани кои се под закана од талибанскиот режим се одвива со утврдениот план и во 2022 година. По привремениот престој во Северна Македонија, група цивили отпатуваа за Канада како нивно трајно одредиште“, псоопштија од Владата.
Како што се наведува во соопштението, 35-те авганистански граѓани кои отпатуваа за Канада се вработени, соработници и членови на нивни семејства, на меѓународната организација „Отворено владино партнерство“.
„Службите на Владата, Министерството за внатрешни работи, Министерството за надворешни работи, Министерството за здравство и Црвениот крст, како и досега, продолжуваат да даваат целосна поддршка на авганистанските граѓани коишто престојуваат во Скопје. Поддршката од страна на сите институции продолжува да се одвива со утврдената динамика и тоа сѐ до комплетирање на документацијата за траен престој во странска држава која ќе е нивно крајно одредиште“, велат од владината прес-служба.
