Даниел Сервер
Мај е вистинскиот момент да се поправи неправдата направена во Букурешт. Чикаго е местото. Самитот на НАТО треба да ѝ испрати покана за членство на Поранешната Југословенска Република Македонија, или Македонија, без оглед за кое име Скопје и Атина ќе се договорат. Соединетите Држави треба јасно да ѝ дадат до знаење на Грција дека повторувањето на грешката од Букурешт не е прифатливо, како што Меѓународниот суд на правдата веќе пресуди.
Ова е дел од излагањето на професорот Даниел Сервер пред Хелсиншката комисија на САД на темата „Западен Балкан и самитот на НАТО 2012“.
„Би било добра идеја во Чикаго да се покани Македонија и да ѝ се навести на Црна Гора дека е добредојдена“.
Според професорот од Универзитетот Џон Хопкинс, денес уште пет западнобалкански земји сè уште се надвор од НАТО и време е да се отвори вратата и да им се дозволи на две од нив да почнат да влегуваат: Македонија и Црна Гора.
Нагласувајќи дека Македонија одлично го заокружила својот акционен план за членство, ги реформирала своите безбедносни структури и ги доближила до стандардите на НАТО, Сервер го цитира бригадниот генерал Вилијам Рој, кој шест месеци бил сместен заедно со македонските трупи во Авганистан. Генералот го фали професионалното ниво на македонските трупи, а како најимпресивен го истакнува развојот на нашиот подофицерски кадар, што е клучно за една добро обучена и дисциплинирана војска.
Сервер заклучува дека единственото нешто што ја спречува Македонија да стане членка на НАТО денес е спорот со Грција за името, поради што таа не доби покана на самитот во Букурешт во 2008.
„Оттогаш Меѓународниот суд на правдата (МСП) пресуди дека Грција ја прекршила Привремената спогодба со владата во Скопје кога во Букурешт го блокирала стапувањето на Македонија во членство“.
Сервер вели дека уште три држави од Западен Балкан ќе останат надвор од НАТО, но ниту една од нив не е подготвена за покана, Босна ги нема исполнето условите, додека Косово допрва треба да почне да размислува за обликот на своите безбедносни сили. Србија нема покажано желба да влезе во НАТО, поради јавниот презир кон Алијансата, која ја бомбардираше земјата во 1999 и одигра клучна улога во одвојувањето на Косово од режимот на Милошевиќ. Сепак, Србија учествува во Партнерство за мир и во Авганистан. Вратата треба да остане отворена, а одлуката треба да ја донесе Белград.
Според Сервер, проширувањето на НАТО на Балканот им служи на интересите на САД не само во тој регион, туку и секаде каде што НАТО и американските сили ќе бидат испратени во иднина.
