„Сите овие години Република Северна Македонија се однесуваше одговорно, како земја која ги разбира глобалните процеси и ги почитува начелата на меѓународното право и добрососедство. Северна Македонија мина низ многу тешки моменти, но благодарејќи на мудроста на своите граѓани и спроведувањето на разумни политики и лидерството на нејзините политичари, успешно ги надмина сите предизвици и искушенија што ѝ застанаа на патот“, рече премиерот.
Тој наведе повеќе тешки одлуки во изминатите години, но кои, како што оцени, овозмиожија прием во НАТО и пристапни преговори со ЕУ, „со заштитени и признаени јазик, идентитет и култура“.
„Од земја што пред 30 години беше домаќин на мировни мисии, сега сме земја што е домаќин на меѓународни преговори. Ова беше направено затоа што се надградуваме на лидерството и искуството и визијата на политичарите и дипломатите кои ги споменав претходно“, нагласи Ковачевски.
Премиерот наведе дека потпишаните договори, како Охридскиот, Преспанскииот и за добрососедство, се потврда на постојаната посветеност да се поплочи патот за тековен и иден развој на земјата кон отворен дијалог.
„Ако има место на светот каде што постои доказ дека дипломатијата функционира за решавањето идентитетски прашања, тогаш тоа е Северна Македонија“, додаде Ковачевски.
Шефот на македонската Влада истакна дека како претседавач со ОБСЕ за 2023 година, нашата земја ги промовира овие суштински начела кои потекнуваат од Повелбата на ОН и чија потврда денес е потребна повеќе од кога било.
„Цврсто веруваме во ОН и нејзините вредности. Цврсто веруваме во нашиот заеднички потенцијал да промовираме инклузивни, ефективни и одржливи глобални влади врз основа на правилата и начелата на меѓународното право, додаде тој.
Во својот говор Ковачевски потенцираше дека пред 30 години и денес, нашите амбиции сè уште се исти. Почит за човековите права и фундаменталните слободи, демократијата и економски развој и решавање на заеднички прашања што ја засегаат нашата планета.
На крајот тој упати покана да се погледне изложбата што заеднички ја организираа Архивот и МНР.
