„Гоце Делчев е еден од најзначајните македонски национални херои, чие наследство силно го промовираме. Од овој став не сме отстапиле ни милиметар. Популистичките игри на ВМРО-ДПМНЕ се на штета на ликот и делото на великанот Делчев. Наспроти ваквото политикантство, во најдобриот дух на визијата на македонскиот великан, ние почнавме со градење мостови и културен натпревар со цел решавање на сите отворени прашања. Тоа бил и неговиот поглед за иднината и тоа е духот во кој ќе продолжиме понатака“, ѝ порача Митреси на ВМРО-ДПМНЕ оценувајќи дека е срамно тоа што таа партија сака да му го направи, како што рече, на македонскиот херој Гоце Делчев.
„Македонскиот национален херој Гоце Делчев не заслужил да го сведеме на политичка декларација! Делото на великанот на македонското револуционерно дело, Гоце Делчев и неговиот историски придонес во создавањето на македонската државност не заслужува ваков потценувачки однос. Моштите на Гоце Делчев се во Скопје, во главниот град на македонската независна држава и тука ќе останат. Гоце Делчев е вграден во македонската национална химна и таму ќе остане. Имаме град што го носи неговото име, училишта и библиотеки, улици и бројни споменици.Големо е неговото дело и почитта за него“; рече Митрески.
Тој ја нагласи оценката дека декларацијата претставува политичко подметнување од страна на ВМРО -ДПМНЕ со цел да се продлабочат поделбите во македонскиот народ.
„Партијата која постојано е против нашите евроинтеграции, во нивниот познат манир, по стоти пат ја промашија темата. Бранат нешто што не е нападнато, и со тоа си ја покажуваат сопствената несигурност и аматеризам. Таквата несигурност, таквиот аматеризам и таквиот дилетантизам нема да дозволиме да биде пренесен на граѓаните. Нема да дозволиме да нѝ држат лекции оние кои со бројни потези го срамат ликот и делото на Делчев“, нагласи координаторот на пратеничката група.
Митрески оцени дека ВМРО-ДПМНЕ е партијата којашто правеше споменици на Ќосето, која на партиски настани воспева и слави личности како Ванчо Михајлов, Тодор Александров и други од тој дел на историјата, како што рече, тотално спротивни на Делчев и на македонските интереси во тој период.
„Вакво политичко понижување на делото на Делчев и штета на грбот на националниот интерес прави да нема разлика помеѓу Христијан Мицкоски и некој други бугарски политичари кои имаат за една цел градење на политички кариери преку одржување на спорот помеѓу двете држави. ВМРО-ДПМНЕ и Мицкоски треба да се засрамат и да ја повлечат нивната т.н. Декларација. Ги повикуваме, ако навистина сакаат да ја видат Северна Македонија во ЕУ, да се вклучат на конструктивен начин во процесите кои се од национален интерес“, рече Митрески.
Тој порача дека СДСМ и коалицијата нема да учествува во дневнополитичкиот театар на ВМРО-ДПМНЕ на кој „единствена цел е да им помогне на оние центри кои не сакаат Северна Македонија да ги почне преговорите со ЕУ“.
